Цахим орчинд үйлдэгдэж буй гэмт хэрэг улам бүр хил дамнасан, нарийн зохион байгуулалттай болж буйтай холбоотойгоор гадаад улсад байрлах сервер, мэдээллийн системээс нотлох баримт гаргуулан авах хэрэгцээ өсөн нэмэгдэж байна. Энэ нь кибер гэмт хэрэгтэй тэмцэх, мөрдөн шалгах ажиллагааг олон улсын түвшинд шуурхай явуулах шаардлагыг бий болгожээ.
Үүнтэй холбогдуулан Цахим хөгжил, инновац, харилцаа холбооны сайдын 2026 оны А/138 дугаар тушаалаар ажлын хэсэг байгуулагдсан байна. Тус ажлын хэсэг нь Европын Холбооны Зөвлөлийн 2001 оны “Кибер гэмт хэргийн тухай Будапештийн конвенц” болон НҮБ-ын Ерөнхий Ассамблейн 2024 онд баталсан “Кибер гэмт хэргийн эсрэг конвенц”-д Монгол Улс нэгдэн орох асуудлыг судалж, дүгнэлт, зөвлөмж боловсруулах үүрэгтэй юм.
Хууль сахиулах, тусгай чиг үүргийн байгууллагууд болон кибер халдлага, зөрчилтэй тэмцэх төвийн төлөөллүүд оролцсон ажлын хэсгийн эхний хуралдаанаар хоёр конвенцын зорилго, хамрах хүрээ, цаашид хийх судалгааны чиглэлийг хэлэлцжээ. Конвенцуудад нэгдсэнээр цахим нотлох баримт солилцох, гэмт хэрэг мөрдөх ажиллагаанд харилцан эрх зүйн туслалцаа авах механизм бүрдэж, Монгол Улсын иргэн, хуулийн этгээдийн эрх ашгийг цахим орчинд хамгаалах чадавх нэмэгдэх юм.